OMMAVIY OFERTA

1. Qo‘llanish sohasi va atamalar

1.1. Platforma — Operator tomonidan boshqariladigan va Xaridor hamda Sotuvchilar (Operator Store yoki Vendorlar) o‘rtasida elektron savdo jarayonlarini ta’minlaydigan mobil ilova yoki veb-resurs (keyingi o‘rinlarda — “Platforma”).

1.2. Operator Store — Operatorning o‘z nomidan faoliyat yurituvchi, Platforma orqali tovarlarni realizatsiya qiluvchi rasmiy do‘koni.

1.3. Vendor — Platformada ro‘yxatdan o‘tgan, mustaqil ravishda o‘z tovarlarini joylashtiruvchi va realizatsiya qiluvchi uchinchi shaxs sotuvchi. Vendor Operatorga nisbatan mustaqil xo‘jalik yurituvchi subyektdir.

1.4. Buyurtma — Xaridor tomonidan Platforma orqali ma’lum tovar(lar)ni sotib olishga qaratilgan, tanlangan tovar, yetkazib berish manzili, aloqa ma’lumotlari va to‘lov usuli ko‘rsatilgan holda rasmiylashtirilgan elektron ariza.

1.5. Kuryer — tovarni yetkazib berish xizmatini amalga oshiruvchi xodim yoki tashkilot. Kuryer Operatorning xizmat ko‘rsatuvchi xodimi bo‘lishi mumkin yoki Vendor tomonidan jalb etilgan mustaqil yetkazib beruvchi bo‘lishi mumkin.

1.6. Promokod, bonuslar, aksiyalar — Platforma tomonidan yoki Vendorlar tomonidan alohida tartibda joriy etiladigan, Xaridor uchun chegirma, qo‘shimcha imtiyoz yoki boshqa rag‘batlantiruvchi mexanizmlarni nazarda tutuvchi marketing vositalari. Ularning qo‘llanish tartibi, amal qilish muddati va shartlari Platforma siyosatlari bilan belgilanadi.

2. Oferta shartlari va aksept tartibi

2.1. Ushbu Ommaviy oferta (keyingi o‘rinlarda — “Oferta”) Platformada e’lon qilingan kundan boshlab kuchga kiradi va Operator tomonidan bekor qilinmaguncha amal qiladi. Operator mazkur Oferta shartlarini bir tomonlama tartibda o‘zgartirish huquqiga ega. Ofertaga kiritilgan o‘zgartirishlar Platformada e’lon qilingan paytdan boshlab kuchga kiradi va shu kundan e’tiboran barcha Xaridorlar uchun majburiy hisoblanadi.

2.2. Xaridor quyidagi harakatlardan birini amalga oshirganda ushbu Oferta shartlarini to‘liq va hech qanday istisnosiz qabul qilgan (aksept qilgan) hisoblanadi: bo‘lgan tugmani bosish; platformada “Sotib olish”, “Buyurtma berish” yoki mazmunan shunga teng buyurtma bo‘yicha to‘lovni, agar u naqd shaklda amalga oshirilsa, kuryerga naqd pul topshirish; platformada taqdim etilgan boshqa tasdiqlovchi amallarni bajarish (jumladan, “Shartlarga roziman”, “Tasdiqlayman”, “To‘lovni amalga oshirish” tugmalarini bosish).

2.3. Xaridor tomonidan aksept amalga oshirilgan vaqtdan boshlab Operator (yoki tegishli Vendor) bilan Xaridor o‘rtasida O‘zbekiston Respublikasi Fuqarolik kodeksining 370–377-moddalariga muvofiq masofaviy savdo shartnomasi tuzilgan hisoblanadi; tomonlar ushbu Ofertada belgilangan shartlarga rioya qilishga majburdir.

3. Platformaning roli va javobgarlik chegarasi

3.1. Platforma Operatori elektron savdo maydonchasini taqdim etuvchi axborot vositachisi bo‘lib, Platforma orqali joylashtirilayotgan tovarlar Operator Store yoki mustaqil sotuvchi sifatida ro‘yxatdan o‘tgan Vendorlar tomonidan realizatsiya qilinadi. Operator Platformada joylashtirilgan har bir tovarning sifati, miqdori, yaroqlilik muddati, tovar tasviri yoki tavsifidagi kamchiliklar uchun bevosita javobgar emas, agar bunday tovar Operator Store tomonidan sotilayotgan bo‘lsa, bundan mustasno.

3.2. Operator va Vendor o‘rtasidagi huquqiy munosabatlar alohida tuziladigan shartnoma orqali tartibga solinadi. Ushbu Ofertada Vendorning Platformada tovar joylashtirish va sotish jarayonidagi mas’uliyati umumiy tarzda belgilangan bo‘lib, u Vendorning Operator oldidagi to‘liq javobgarligini istisno etmaydi.

3.3. Operatorning majburiyatlari quyidagilardan iborat: platformaning texnik ishlashini ta’minlash; xaridor va sotuvchilar o‘rtasidagi elektron savdo jarayonlarini tashkil qilish; mijozlarni qo‘llab-quvvatlash xizmatini yo‘lga qo‘yish; platformada joylashtiriladigan kontentga (Vendor tomonidan kiritiladigan ma’lumotlardan tashqari) texnik filtrlash chora-tadbirlarini qo‘llash; shaxsiy ma’lumotlarni qonun talablariga muvofiq qayta ishlash va himoyalash.

3.4. Operator quyidagi holatlar uchun javobgar emas: platformadan tashqarida Vendor tomonidan sodir etilgan harakatlar yoki majburiyatlarning bajarmasligi; Vendorning tovar sifati, yaroqliligi, yetkazib berishdagi xatolari yoki noto‘g‘ri ma’lumot taqdim etishi; Xaridor tomonidan noto‘g‘ri ma’lumot kiritilishi yoki buyurtma parametrlarini xato ko‘rsatishi natijasida yuzaga keladigan oqibatlar; internet tarmoqlaridagi uzilishlar, texnik nosozliklar yoki Operatorning bevosita nazoratida bo‘lmagan holatlar.

3.5. Operatorning javobgarligi faqat uning to‘g‘ridan-to‘g‘ri harakatlari (harakatsizligi) oqibatida, qonunchilikda belgilangan tartibda, aybi isbotlangan taqdirda yuzaga keladi. Operatorning vositachilik xususiyatidan kelib chiqib, u: Vendorning tijorat faoliyati; Vendorning soliq, sertifikatlash yoki ruxsatnomalar bo‘yicha majburiyatlari; Vendorning kuryerlari tomonidan ko‘rsatiladigan xizmatlar uchun javobgar emas.

4. Tovarlar va Vendorlarni ro‘yxatga olish tartibi

4.1. Platformada joylashtiriladigan tovarlar O‘zbekiston Respublikasi qonunchiligiga muvofiq realizatsiya qilinishi lozim. Sotishga taqiqlangan yoki cheklangan tovarlar ro‘yxati (jumladan, qurol-yarog‘ va o‘q-dorilar, narkotik va psixotrop moddalar, retsept asosida beriladigan dori vositalari, alkogol mahsulotlari, tamaki mahsulotlari, pornografik materiallar va boshqa qonun bilan cheklangan tovarlar) Platformaning ichki siyosatlari bilan belgilab qo‘yiladi. Vendor ushbu cheklovlarga to‘liq rioya etishi shart va bunday talablarning buzilishi Vendorning Platformadan chetlashtirilishiga hamda huquqiy javobgarlik yuzaga kelishiga sabab bo‘lishi mumkin.

4.2. Vendor Platformaga joylashtiriladigan har bir tovar bo‘yicha to‘liq, haqqoniy, aniqlashtirilgan va iste’molchiga yetarli darajada ma’lumot beruvchi tavsifni taqdim etishi shart. Tavsifda tovarning asosiy xususiyatlari, tarkibi, yaroqlilik muddati, ogohlantiruvchi va ehtiyot choralariga oid ma’lumotlar, shuningdek, foto yoki grafik tasvirlar ko‘rsatilishi lozim.

4.3. Tovar tavsifi, narxi, tasviri, miqdori, komplektatsiyasi yoki yetkazib berilgan tovarning haqiqiy holati bo‘yicha kelib chiqadigan har qanday ixtiloflar uchun to‘liq javobgarlik tovarni realizatsiya qilayotgan sotuvchiga — Vendor yoki Operator Store’ga yuklatiladi. Operator ushbu ma’lumotlarning aniqligi uchun javobgar emas, agar tovar Operator Store tomonidan sotilayotgan bo‘lsa, bundan mustasno.

4.4. Vendor Platformada joylashtiriladigan tovarlar bo‘yicha zarur sertifikatlar, ruxsatnomalar, gigiyena xulosalari yoki boshqa normativ talab etiladigan hujjatlar mavjudligini mustaqil tartibda ta’minlaydi. Bunday hujjatlarning mavjud emasligi yoki soxtaligi yuzasidan javobgarlik faqat Vendor zimmasiga yuklatiladi.

4.5. Vendor Platformada tovarni joylashtirish orqali Operatorga tovarning qonuniy kelib chiqishi, sifati va iste’molchilarga realizatsiya qilish uchun barcha zarur talablar bajarilganligi bo‘yicha kafolat beradi.

5. Narxlar va to‘lovlar

5.1. Platformada ko‘rsatiladigan barcha narxlar o‘zgaruvchan bo‘lib, har bir Vendor o‘zining mustaqil narx siyosatini yuritadi. Operator Store ham o‘z narxlarini mustaqil ravishda belgilaydi. Platforma narxlarni ko‘rsatish formati, aks ettirish tartibi va texnik talablari bo‘yicha yagona standartlarni belgilaydi. Narxdagi barcha soliqlar, yig‘imlar yoki qo‘shimcha xarajatlar (agar mavjud bo‘lsa) narx ko‘rsatilishida aniq aks ettiriladi.

5.2. Ushbu Ofertaga muvofiq asosiy to‘lov shakli — naqd pul hisoblanadi. Naqd to‘lov tartibi quyidagicha belgilanadi: Naqd to‘lov tovarni yetkazib berish chog‘ida faqatgina kuryer tomonidan qabul qilinadi (Vendor kuryeri yoki Operator kuryeri bo‘lishi mumkin). Naqd pulni bevosita qabul qilgan kuryerning ish beruvchisi (Vendor yoki Operator) to‘lovni qabul qilish, hisob-kitob, pulni xavfsiz saqlash va uni tegishli tartibda rasmiylashtirish uchun to‘liq javobgar hisoblanadi. Agar Operator naqd pulni bevosita o‘zi qabul qilmasa, Operator naqd pul aylanishi, yo‘qolishi, noto‘g‘ri hisob-kitob qilinishi yoki kuryer tomonidan noto‘g‘ri muomala tufayli kelib chiqadigan holatlar uchun javobgar emas.

5.3. Kelgusida Platformada onlayn to‘lov (bank kartasi, elektron to‘lov tizimlari va boshqa raqamli to‘lov vositalari) joriy etilgan taqdirda: to‘lovlar O‘zbekiston Respublikasining tegishli bank qonunchiligi va to‘lov tizimlari operatorlarining ichki qoidalariga muvofiq qayta ishlanadi; zaxira summasi, tranzaksiyani tasdiqlash, qaytarish mexanizmi, texnik blokirovka va boshqa jarayonlar Platforma siyosatlari bilan tartibga solinadi; onlayn to‘lovlar bo‘yicha cheklar, fiskal hujjatlar va tranzaksiya tasdig‘i to‘lov tizimi operatori tomonidan shakllantiriladi.

5.4. Narx ko‘rsatilishida texnik xatoliklar (masalan, tovarning ancha past yoki yuqori narxda ko‘rsatilishi, nol qiymat, noto‘g‘ri chegirma qo‘llanishi) yoki tovar tavsifiga oid chalkash ma’lumotlar aniqlangan taqdirda, Operator yoki Vendor buyurtmani bir tomonlama tartibda bekor qilish huquqiga ega. Ushbu holatda: xaridor to‘lovni amalga oshirgan bo‘lsa, unga qonunchilikda belgilangan tartibda va muddatlarda to‘langan summa to‘liq qaytariladi; operator ushbu bekor qilish bo‘yicha Xaridorni Platforma orqali zudlik bilan xabardor qiladi.

6. Buyurtma, yetkazib berish va qabul qilish tartibi

6.1. Buyurtma vaqtida yetkazib berish intervali. Xaridor buyurtma rasmiylashtirish jarayonida Platformada ko‘rsatilgan mavjud yetkazib berish vaqt oralig‘idan (intervallar bo‘yicha) birini tanlaydi. Operator Store yoki Vendor tanlangan interval doirasida buyurtmani yetkazib berishga intiladi. Standart yetkazib berish muddati — buyurtma Operator yoki Vendor tomonidan tasdiqlangan vaqtdan boshlab o‘rtacha 2 (ikki) soatni tashkil etadi. Logistika sharoitlari, kutilmagan texnik yoki tashkiliy omillar sababli yetkazib berish muddati uzayishi mumkin; bunday kechikish 24 (yigirma to‘rt) soatdan oshmagan taqdirda fors-major holati hisoblanmaydi, va kechikish uchun javobgarlik tegishli sotuvchi (Vendor yoki Operator Store) zimmasida bo‘ladi.

6.2. Yetkazib berish usullari. Platformada quyidagi yetkazib berish shakllari qo‘llanilishi mumkin: operatorning o‘z kuryerlari orqali yetkazib berish; Vendor tomonidan jalb qilingan mustaqil kuryerlar orqali yetkazib berish; Xaridor tomonidan buyurtmani pick-up punktidan yoki Operator/Vendor do‘konidan mustaqil olib ketish (agar bu funksiya mavjud bo‘lsa). Xaridor yetkazib berish uchun ko‘rsatilgan manzil yoki aloqa ma’lumotlari noto‘g‘ri bo‘lsa, yoki Xaridor kuryer bilan bog‘lanmasa, buyurtma “yetkazib berib bo‘lmasligi sababli bekor qilingan” holat sifatida qayd etiladi. Bunday holatlarda yetkazib berish xarajatlari Xaridordan undirilishi mumkin.

6.3. Tovarni qabul qilish tartibi. Xaridor tovarni qabul qilgan zahoti quyidagilarni tekshirishi shart: tovarning tashqi ko‘rinishi; tovarning miqdori va komplektatsiyasi; o‘ramning holati; yaroqlilik muddati (agar qo‘llanilsa). Kamchiliklar, yetishmovchiliklar yoki tashqi nuqsonlar aniqlangan taqdirda Xaridor ularni darhol kuryerga bildirish yoki Platformadagi qo‘llab-quvvatlash xizmatiga murojaat qilish majburiyatiga ega.

6.4. Reklamatsiya muddati va tartibi. Agar Xaridor tovarni qabul qilib olinganidan so‘ng kamchilikni aniqlasa, u buni tegishli sotuvchiga (Vendor yoki Operator Store) 24 (yigirma to‘rt) soat ichida yozma shaklda (Platforma orqali, qo‘llab-quvvatlash xizmatiga yoki rasmiy aloqa kanali orqali) bildirishi mumkin. Ushbu muddat o‘tganidan so‘ng: tashqi ko‘rinish, o‘ram, miqdor yoki komplektatsiyaga doir da’volar qoniqtirilmasligi mumkin; iste’molchi huquqlari qonunchiligi bilan kafolatlangan holatlar bundan mustasno (masalan, yashirin nuqsonlar). 24 soatlik qoidaning mazmuni va amaliy qo‘llanishi Platformaning ichki siyosatlarida batafsil bayon qilinadi.

7. Qaytarish va reklamatsiya tartibi

7.1. Reklamatsiya berish huquqi. Xaridor tovarni qabul qilib olgandan so‘ng unda kamchilik, nuqson, noto‘g‘ri komplektatsiya, noto‘g‘ri tovar yetkazilishi yoki buyurtma parametrlariga nomuvofiqlik aniqlangan taqdirda reklamatsiya berish huquqiga ega. Reklamatsiya tovarni realizatsiya qilgan subyektga — Vendor yoki Operator Store’ga yo‘naltiriladi. Operator (Platforma) bu jarayonda vositachi sifatida texnik yordam ko‘rsatishi mumkin, biroq tovar sifati bo‘yicha bevosita javobgar emas (agar tovar Operator Store tomonidan sotilmagan bo‘lsa).

7.2. Reklamatsiyani ko‘rib chiqish muddati. “Iste’molchilarning huquqlarini himoya qilish to‘g‘risida”gi Qonunga muvofiq, reklamatsiya qabul qilinganidan so‘ng: nuqsonli yoki noto‘g‘ri yetkazilgan tovarlar bo‘yicha pulni qaytarish yoki almashtirish 10 (o‘n) kun ichida amalga oshiriladi; mahsulotni tekshirish uchun qo‘shimcha ekspertiza talab qilinsa, ushbu muddat qonunda belgilangan tartibda uzaytirilishi mumkin.

7.3. Qaytarilishi cheklangan mahsulotlar. Tovarlarning ayrim toifalari (sanitariya-gigiyena buyumlari, parfyumeriya, kosmetika, shaxsiy foydalanishdagi predmetlar, oziq-ovqat mahsulotlari va boshqa qaytarilishi taqiqlangan tovarlar) faqat: yashirin nuqson aniqlanganda; yaroqlilik muddati o‘tgan bo‘lsa; tovar xavfsiklik talablariga javob bermasa qaytarilishi mumkin. Boshqa hollarda qaytarish amaldagi qonunchilikka muvofiq cheklanadi.

7.4. Oziq-ovqat mahsulotlari bo‘yicha maxsus tartib. Tez buziluvchi oziq-ovqat mahsulotlari va sanitariya talablariga alohida rioya etiladigan tovarlar uchun qaytarish talablari ishlab chiqaruvchi, SSV talablari va sanitariya-gigiyena me’yorlari asosida belgilanadi. Bunday mahsulotlarni qaytarish faqat sifat nuqsoni mavjudligi isbotlanganda amalga oshiriladi.

7.5. Qaytarish usuli. Qaytariladigan tovar uchun kompensatsiya quyidagi tartibda amalga oshiriladi: Xaridor to‘lovni qaysi usulda amalga oshirgan bo‘lsa (naqd, karta yoki elektron to‘lov), qaytarish asosan o‘sha usulda amalga oshiriladi. Agar Vendor va Xaridor o‘rtasida o‘zaro kelishuv mavjud bo‘lsa, kompensatsiya: xizmat kreditlari, promokod, yoki keyingi xaridlar uchun bonus shaklida taqdim etilishi mumkin. Bu usul faqat Xaridorning roziligi bilan qo‘llaniladi.

7.6. Qaytarilayotgan tovarning holati. Qaytarilayotgan tovar quyidagi talablarga javob berishi lozim (qonunda nazarda tutilgan istisnolar bundan mustasno): tovarning iste’mol xususiyatlari saqlangan bo‘lishi; zavod qadoqlashi (agar nazarda tutilgan bo‘lsa) buzilmagan bo‘lishi; tovar qaytarish uchun tegishli gigiyena talablariga javob berishi.

7.7. Javobgarlik. Tovar sifatiga oid barcha javobgarlik tovarni realizatsiya qilgan sotuvchiga (Vendor yoki Operator Store) yuklatiladi. Operator (Platforma) tovar sifatidan kelib chiqadigan reklamasiyalar uchun javobgar emas, biroq reklamatsiyalarni ko‘rib chiqish tartibi, jarayonni yengillashtirish va mijoz bilan aloqa o‘rnatishda texnik yordam ko‘rsatadi.

8. Shaxsiy ma’lumotlar va maxfiylik

8.1. Shaxsiy ma’lumotlarni qayta ishlash asoslari. Operator Xaridorning shaxsiy ma’lumotlarini O‘zbekiston Respublikasining “Shaxsga doir ma’lumotlar to‘g‘risida”gi Qonuni, “Elektron tijorat to‘g‘risida”gi Qonun hamda boshqa amaldagi normativ-huquqiy hujjatlar talablari asosida qayta ishlaydi. Shaxsiy ma’lumotlarni qayta ishlashning asosiy maqsadlari:

• buyurtmalarni qabul qilish va bajarish;
• tovarni yetkazib berish;
• to‘lovni qayta ishlash va moliyaviy operatsiyalarni yuritish;
• Xaridor bilan aloqa o‘rnatish va texnik yordam ko‘rsatish;
• Platformaning xavfsizligi, audit va ishlashini ta’minlash;
• Operatorning qonuniy manfaatlarini himoya qilish.

8.2. Ma’lumotlarni uchinchi shaxslarga berish shartlari. Xaridorning shaxsiy ma’lumotlari faqat quyidagi hollarda uchinchi shaxslarga taqdim etilishi mumkin: yetkazib berish jarayoni uchun – kuryerlarga yoki logistika xizmatlariga; to‘lovlarni qayta ishlash uchun – banklarga yoki to‘lov tizimlariga; qonunchilik talab etgan hollarda – sud, tergov organlari, davlat organlariga; Vendorlarga – faqat buyurtmani bajarish uchun zarur miqdorda (ism, manzil, telefon raqami). Uchinchi shaxslarga beriladigan ma’lumotlar hajmi minimal bo‘lib, faqat tegishli vazifani bajarish uchun zarur bo‘lgan elementlar bilan cheklanadi.

8.3. Ma’lumotlarni saqlash va himoyalash. Operator Xaridorga tegishli shaxsiy ma’lumotlarni yo‘qotish, noqonuniy o‘zgartirish, ruxsatsiz kirish yoki oshkor qilinishdan himoya qilish uchun texnik va tashkiliy choralarni qo‘llaydi. Ma’lumotlar Operatorning ichki siyosati va qonunchilikda nazarda tutilgan muddatlarda saqlanadi.

8.4. Xaridorning majburiyatlari. Xaridor Platformadagi shaxsiy kabinetinga kirish uchun mo‘ljallangan login, parol va boshqa autentifikatsiya vositalarini sir saqlashi shart. Ushbu ma’lumotlarni uchinchi shaxslarga taqdim etish taqiqlanadi. Xaridor tomonidan noto‘g‘ri yoki soxta ma’lumot kiritilishi, shuningdek, shaxsiy kabinetinga uchinchi shaxs tomonidan ruxsatsiz kirilishi oqibatida yuzaga kelgan barcha zarar va xavflar uchun javobgarlik to‘liq Xaridor zimmasida bo‘ladi.

8.5. Rozilik. Xaridor Platformadan foydalanish, ro‘yxatdan o‘tish yoki buyurtma joylashtirish orqali Operator tomonidan shaxsiy ma’lumotlarni qayta ishlashga to‘liq rozilik bildirgan hisoblanadi.

8.6. Ma’lumotlarni o‘zgartirish va o‘chirish. Xaridor shaxsiy kabinetingiz yoki Operatorning qo‘llab-quvvatlash xizmati orqali shaxsiy ma’lumotlarini o‘zgartirish, yangilash yoki qonunchilikda belgilangan hollarda ularni o‘chirishni talab qilish huquqiga ega.

9. Sotuvchi (Vendor) va Operatorning majburiyatlari

9.1. Sotuvchining majburiyatlari (Vendor yoki Operator Store). Sotuvchi Platforma orqali realizatsiya qilinadigan tovarlar bo‘yicha quyidagi majburiyatlarni bajaradi: tovarning sifati, xavfsizligi va yaroqlilik muddatiga to‘liq javob berish; tovarni Platformada to‘g‘ri va haqqoniy tarzda tasvirlash, narx, tavsif, tarkib, miqdor va boshqa zarur ma’lumotlarni aniq ko‘rsatish; buyurtmani Operator yoki Platformada belgilangan muddatlar doirasida o‘z vaqtida yetkazilishini ta’minlash; Xaridor reklamasiyasi yoki shikoyatlarini qonunchilikda belgilangan talablar asosida ko‘rib chiqish, natijasi haqida o‘z vaqtida xabar berish; tovar sifatiga oid nizolarni mustaqil ravishda hal etish va zarur hollarda mahsulotni almashtirish yoki pulni qaytarishni ta’minlash; sanitariya-gigiyena, sertifikatlash, ruxsatnomalar va boshqa majburiy talablarning bajarilishini ta’minlash; tovarni yetkazib berayotgan kuryerning harakatlari uchun (Vendor kuryeri bo‘lsa) to‘liq javobgar bo‘lish. Vendor Platformada faoliyat yuritish orqali Operator oldida tovarning qonuniy kelib chiqishi, sifat talablariga muvofiqligi hamda iste’molchilar manfaatlari ko‘rilishiga doir barcha mas’uliyatni o‘z zimmasiga oladi.

9.2. Operatorning majburiyatlari. Operator Platformaning texnik va tashkiliy jihatdan uzluksiz ishlashini ta’minlash uchun quyidagi majburiyatlarni bajaradi: Platformaning to‘g‘ri ishlashini ta’minlash (mobil ilova va veb-resurs); foydalanuvchilar uchun doimiy texnik qo‘llab-quvvatlash xizmatini yo‘lga qo‘yish; Vendorlarni ro‘yxatdan o‘tkazish, ularning faoliyatini Platforma siyosatlari asosida boshqarish; Xaridorlarga to‘g‘ri axborot berilishi uchun Platformada texnik filtrlash va monitoring tizimlarini joriy etish; shaxsiy ma’lumotlarni qonunchilik talablariga muvofiq himoyalash va qayta ishlash; buyurtmalarni rasmiylashtirish, ko‘rsatkichlarni hisobga olish, logistika jarayonlari haqida axborot almashish uchun texnik vositachilikni ta’minlash. Operator quyidagilar uchun javobgar emas: Vendor tomonidan joylashtirilgan noto‘g‘ri yoki chalg‘ituvchi ma’lumotlar; Vendorning tovar sifati, yaroqlilik muddati yoki xavfsizlik talablariga rioya qilmasligi; Vendorning kuryerlari tomonidan yetkazib berish vaqtida sodir etilgan xatti- harakatlar; Vendorning hisob-kitob, pul qabul qilish yoki qaytarish jarayonidagi xatoliklari (agar Operator bu jarayonlarni bevosita amalga oshirmasa). Operator zarur hollarda (masalan, qonunchilik, iste’molchi huquqlarini himoya qilish, xavfsizlik talablari bo‘yicha) Xaridor va Vendor o‘rtasidagi masalalarni hal etishda yordam berishi mumkin, biroq tovar sifatiga doir nizolarda asosiy javobgar shaxs — tovarni realizatsiya qilgan Sotuvchi hisoblanadi.

10. Fors-major va texnik uzilishlar

10.1. Fors-major holatlari. Tomonlar o‘zlarining ushbu Ofertadan kelib chiqadigan majburiyatlarini bajarishni vaqtincha imkonsizlashtiradigan yoki kechiktiradigan favqulodda va oldindan ko‘rib bo‘lmaydigan holatlar — fors-major deb e’tirof etiladi. Bunday holatlarga quyidagilar kiradi: tabiiy ofatlar (zilzila, suv toshqini, yong‘in, kuchli shamol va h.k.); urush, harbiy harakatlar, terrorchilik aktlari; epidemiya, karantin, favqulodda holat rejimlari; davlat organlarining buyruqlari, qarorlari yoki cheklovlari; umumiy kommunikatsiya tizimlaridagi uzilishlar (internet keskin ishdan chiqishi, elektr energiyasi uzilishi); qonun bilan fors-major sifatida e’tirof etiladigan boshqa holatlar. Fors-major holati yuzaga kelgan taqdirda Tomonlar mazkur Ofertadagi majburiyatlarini tegishli holat bartaraf etilguncha vaqtincha bajarishdan ozod qilinadi.

10.2. Fors-major haqida xabardor qilish. Fors-major holati yuzaga kelgan Tomon mazkur holatni iloji boricha qisqa muddatda ikkinchi Tomonga xabar qilishi, uning oqibatlarini yumshatish uchun barcha zarur harakatlarni amalga oshirishi shart.

10.3. Operatorning texnik uzilishlardagi javobgarligi. Platformaning ishlashi quyidagi holatlar tufayli vaqtincha to‘xtashi mumkin: serverlar, data-markazlar, infratuzilma yoki dasturiy ta’minotdagi texnik nosozliklar; internet provayderlari tomonidan xizmat ko‘rsatishdagi uzilishlar; kutilmagan texnik profilaktika ishlari; Operatorning nazorat doirasidan tashqaridagi kommunikatsion muammolar. Ushbu holatlarda Operator ushbu Oferta bo‘yicha majburiyatlardan javobgarlikdan ozod etiladi, biroq: uzilishlarni imkon qadar tezkor bartaraf etish, tizimni tiklash uchun oqilona texnik va tashkiliy chora-tadbirlarni ko‘rish, imkon doirasida Xaridorlarni xabardor qilish kabi majburiyatlarni o‘z zimmasida saqlaydi.

10.4. Fors-major majburiyatlarni to‘liq bekor qilmaydi. Fors-major tugatilganidan so‘ng Tomonlar o‘z majburiyatlarini mazkur Ofertaga muvofiq odatdagi tartibda davom ettiradilar. Fors-major holati majburiyatni butunlay bekor qilmaydi, balki uni bajarishni kechiktiradi.

11. Nizolarni hal etish tartibi

11.1. Mazkur Oferta bo‘yicha yuzaga keladigan har qanday kelishmovchilik va nizolar, avvalo, Tomonlar o‘rtasida muzokara va o‘zaro fikr almashuvi orqali kelishuv yo‘li bilan hal etiladi. Xaridor Platforma orqali ko‘rsatilgan qo‘llab- quvvatlash xizmatiga murojaat qilishi mumkin, Operator esa arizani qonunchilikda belgilangan tartibda ko‘rib chiqadi.

11.2. Muzokaralar natijasida kelishuvga erishilmagan taqdirda, nizo O‘zbekiston Respublikasining amaldagi qonunchiligiga muvofiq sud tartibida ko‘rib chiqiladi.

11.3. Sudga taalluqli nizolar Operatorning davlat ro‘yxatidan o‘tgan joyi bo‘yicha hududiy vakolatli sudda ko‘rib chiqiladi, bundan iste’molchilar huquqlarini himoya qilish bilan bog‘liq nizolar uchun qonunchilikda nazarda tutilgan istisnolar mustasno.

11.4. Tomonlarning elektron yozishmalari, Platforma orqali rasmiylashtirilgan buyurtmalar, elektron tasdiqlar, operator jurnal (log) ma’lumotlari, tranzaksiya yozuvlari va boshqa elektron axborot tashuvchilar ushbu Ofertaga muvofiq sudda dalil sifatida e’tirof etilishi mumkin.

12. Yakuniy qoidalar

12.1. Ushbu Oferta Platformada e’lon qilingan kundan boshlab kuchga kiradi va Operator tomonidan qaytarib olinmaguncha amal qiladi. Xaridor tomonidan Ofertaning aksept qilinishi bilan (Ofertaning 2-bo‘limida ko‘rsatilgan harakatlar asosida) Tomonlar o‘rtasida masofaviy savdo shartnomasi tuzilgan hisoblanadi va Oferta shartlari Tomonlar uchun majburiy bo‘ladi.

12.2. Operator ushbu Ofertaga o‘zgartirish va qo‘shimchalar kiritish huquqiga ega. Kiritilgan o‘zgartirishlar Platformada e’lon qilingan kundan boshlab kuchga kiradi va yangi o‘zgartirilgan tahrir barcha Xaridorlar uchun majburiy hisoblanadi.

12.3. Ushbu Ofertaning biror bandidagi haqiqiy emaslik yoki yuridik kuchga ega emasligi, boshqa bandlarning haqiqiyligiga va yuridik kuchiga ta’sir qilmaydi. Bunday band o‘rniga amaldagi qonunchilikka mos keladigan, mazmunan eng yaqin normaning qo‘llanishi nazarda tutiladi.

12.4. Oferta elektron shaklda tuzilgani bois, u yagona nusxadagi yozma shartnoma bilan teng huquqiy kuchga ega. Elektron tasdiqlar, buyurtma tarixlari, tranzaksiya yozuvlari va Platforma loglari ushbu shartnoma bo‘yicha hujjatli dalil sifatida e’tirof etiladi.